Fengselsbesøk

I dag har teamet mitt vore å delteke på gudstjeneste i Hamar kretsfengsel! Det var utruleg spanande, givande og lærerikt. Vi song to songar, fortalde kort om Gå Ut Senteret, og om oppgåvene våra i Ecuador. Siri fortalde også om kvifor ho valde å byrje på GUS.

Det var ei spesiell kjensle å sitje der under gudstjenesta, saman med ei forsamling av "kriminelle". Dei fleste var omlag på vår alder, eller midten av 20, byrjinga av 30 åra, og i bunn og grunn veldig kjekke folk å prate med. Det heile ga berre meining når presten i preika si tok opp det at Jesus åt saman med syndarar og tollarar, og at han ikkje elskar dei feilfrie- for slike folk finst ikkje. Det viktigaste er ikkje å prøve å leve eit mest mogleg perfekt liv, men å elske nesten din som deg sjølv. For då vil resten kome av seg sjølv, og du vil byrje å kjenne inni deg kva som er rett og gale, godt og vondt. Han brukte døme som "Å sei noko venleg til den som sit i nabocella di", med andre ord- han la opp preika si veldig etter målgruppa. Det var rett og slett ei veldig givande oppleving å sitje der! Og så var det så godt å sjå at så og seie alle gjekk til nattverd, og at vi saman kunne ta del i syndenes forlating- uansett bakgrunn.

Etter gudstjenesta tok vi oss tid til å prate med folket, medan vi åt frukost ilag. Frukostbordet var biljard- og bordtennisbord dekka av ein kvit papirduk- passe stilig ;) Når gutane vart låste inn på cellene sine igjen, fekk vi ei lita omvisningsrunde i fengselet, der vi kunne spørje om kva det måtte vere. Og det var ikkje reint lite vi hadde å spørje om akkurat... Eg kjenner eg har lært så utruleg mykje i dag, hovudet mitt er heilt stappa for nye intrykk! Men eg må seie eg ser fram til neste besøk, for ja- team Ecuador vil nok kome tilbake på besøk til våren også :)